Northeimer Datenbank Deutsches Gedicht

Blümelein von

Blümelein

Ich weiß mir ein blümelein blaue
von himmeklarem schein,
es stet in grüner aue,
es heißt: ?Vergißt nit mein!"
Ich kunt es nimmer finden,
was mir verschwunden gar,
vor reif und kaltem winde
ist es nimmer da.

Ich weiß mir ein blümlein weiße,
es stet in jenem ried,
von art ist es so kleine,
es heißt nun: ?Hab mich lieb!"
Es ist mir abgemäjet
wol in dem herzen mein:
mein lieb hat mich verschmähet,
ich kan nit frölich sein.

Das blümlein das ich meine
das ist rosina rot,
ist Herzentrost genennet
auf dirrer heide stot.
Sein farb' ist im verblichen,
der Wolgemut ist verdorrt
mein lieb ist mir entwichen
verlorn hab ich mein hort.

Ich weiß mir ein blümlein weiße,
stet mir im grünen gras,
ist gewachsen mit großem fleiße,
es heißt nun gar: Schabab!
Das blümlein muß ich tragen
wol disen summer lang,
vil lieber wolt ich haben
meins bulen umbefang.

Noch heur gen disem summer
kumt uns der lichte mei,
dringt uns der blümlein wider
der farben mengerlei.
Bringt uns der blümlein wider
braun, weiß, gelb, nach der zeit,
so lert ir mich hinwider
was ein jeglichs blümlein bedeut.

O du herzig Wolgemut
wie erfreustu mich so ser!
Kein blümlein mir nit lieber tut,
zu eren ich dein beger.
Ich beger dein ewig zu bleiben
bis uff das ende mein!
halt mich in deiner werde,
herzlieb, vergiß nit mein!

Mein herz leidt großen kummer,
da mein vergessen ist.
So hoff ich uff den summer,
wol uff des maies frist.
Wann sind die reifen vergangen
und auch der kalte schnee,
von der allerliebsten werd ich entfangen,
tets dem klaffer im herzen we.

Der reif mit seinen zeichen
verderbt vil blümlein zart,
get umb der klaffer schmeichlen
mit ungetreuer art.
Vil großer lieb auf erden
die ietzund muß zergan:
was mir heuer nit mag werden,
das wil ich ein ander jar han.

Herzlieb, du darfst nit denken,
daß ich wil von dir lan;
an dir will ich nit wenken,
bei dir kan ich nit stan.
Was ich gern tet in treuen,
das schaft mir ungewin.
herzlieb, nu halt dich stete,
wie fern ich von dir bin!

16. Jahrhundert